Les mots surlignés font l'objet d'une note
1Reçue à Grenoble, le 10 mars 1573. Répondue le 11 mars 1573.
2Monsieur de Gordes, j’ay tousjours creu et estimé, comme je faictz encores, que
3la ville de Nismes prise et les autres lieux qu’occuppent mes rebelles reduictz,
4que non seullement mon pays de Languedoc, mais aussy le Daulphiné et les autres
5contiguz seroient à repoz. Au contraire si lesdites villes demeuroient au pouvoir d’iceulx
6rebelles, il n’y auroit seureté quelconque. Au moien de quoy, j’ay desiré y faire ung bon
7effort, et pour ce faire ne surcharger pour autre occasion mes subiectz. Toutesfois après
8avoir bien consideré votre lettre du XVIIe, je suis contant suivre votre conseil, et ne laisser votre gouvernement despourveu de toutes forces. Partant, si mon cousin
9le marechal de Dampville mande toutes voz quatre compaignies de gens de
10pied, et si le pays consent lentretenement de deux autres pour departir aux lieulx
11plus necessaires, je trouve bon que leviez lesdites deux compaignies et que ledit païs porte
12ceste despence encores pour quelque temps. Jacois que je desirois plus quil s’en peust
13passer, estant assez affligé d’ailleurs. Toutesfois comme je vous ay donné entière
14charge de mes affaires pardelà et que je m’en repose du tout sur vous, je veulx
15bien suivre aussy votre advis en toutes choses, m’asseurant que le me donnerez tousjours
16conforme à la raison et à ce qui sera plus utille pour mon service et soullagement de
17mes subiectz. Il n’est besoing que vous metiez en peyne d’envoyer pour les poudres
18et boulletz que je pretendois avoir de Montmellian, car mon oncle le duc de
19Savoye ne m’en peult faire delivrer par cest endroit comme il m’a mandé, ains
20seullement à Bourg en Bresse, où j’ay donné charge au sieur de Mandelot envoyer.
21Priant Dieu, monsieur de Gordes, vous avoir en sa garde. Escript à St Leger, le dernier
22jour de fevrier 1573.
23Charles
24De Neufville